【放大鏡】
一天，我到超市買嘢，行到餅乾嗰行，我見到一位伯伯，用放大鏡好專注睇咗成分鐘冇郁過！
於是，我主動上前問佢：「伯伯，有冇乜嘢我可以幫到你？」
伯伯好驚訝，擰轉頭望我：「妳可唔可以幫我睇吓幾錢？我睇嚟睇去都睇唔到！」
我：「當然可以！$13.9/件，買二送一，即$27.8/3件，平均9.3左右一件！」
伯伯：「抵喎！平日賣開$11個幾㗎！唔該哂妳！」
我：「唔好客氣！你慢慢揀啦！有好多款唔同味！」
伯伯：「係？」
我即刻讀哂所有味俾佢聽，伯伯邊笑邊點頭，最後都係鍾情芝士味！
伯伯：「唔該哂妳！太細隻字，我睇唔到…」
我：「唔緊要！我係老人中心社工嚟！我都覺得超市應該將啲字寫大啲！太細隻老人家好難睇得到！」
伯伯笑住點點頭：「啊！」
伯伯拎住三盒芝士餅離開…
我同佢告別，買完嘢後，亦去探肥媽喇！
《阿肥嘅心聲：》
一個人老咗，視力退化在所難免，社會如果多啲關心老人家嘅需要，佢哋嘅生活亦易過啲！
好似食品包裝盒上嘅字(如：食用日期)，大部份都好細，有時連我哋後生嘅都要好用心先睇到！
超市嘅價錢牌，字細又複雜，乜嘢超抵價、出位價、買幾送幾，老人家睇唔到價錢，睇唔明優惠，好多時又會買貴咗！
我真心希望大家能多啲關注年長嘅一輩，彼此共同努力，建立一個關懷長者嘅友善社區。
Search